Microsoft ham megakorporatsiya bo’la oladi

Bir necha oy avval ulkan korporatsiyalarning monopollashib borishi haqida mulohaza qilgan edik. Bular Apple, Google, Nvidia va Amazon edi. Bularda megakorporatsiya bo’lish potensiali juda yuqori ekanligi haqida fikrlar bor va buni har kim turlicha talqin qiladi. Biz esa o’zimizcha bu savolni o’rganishga qaror qilgan edik. Bugun yuqoridagi qudratli kompaniyalar ro’yxatini Microsoft bilan to’ldirmoqchiman. Nega avvalroq Microsoft bunday kompaniyalar guruhiga qo’shilmagan edi? degan savol paydo bo’lishi tabiiy.
Sababi Microsoft kompaniyasi hali o’rganilmagan edi. Bugun yillik hisobotini ko’rib Linkedin Microsoftga tegishli ekanini bilib oldim. Wikipediyada yozilishicha Linkedin 2016 yilda Microsoft kompaniyasiga $26.2 milliardga sotilgan ekan. Kompaniya sotilayotgan vaqt boshqaruvda Jeff Vayner ismli muqaddam Yahoo kompaniyasining ham boshqaruvida ishlagan shaxs bo’lgan (eslatma: Yahoo 2017 yilda Verizonga sotilgan edi). MDH davlatlarida Linkedindan ko’p foydalanishmaydi. Rossiyada esa umuman ushbu ijtimoiy tarmoq bloklangan (vaziyat bizda Twitter bloklanganligiga o’xshash).
Linkedinsiz Microsoft qudratli korporatsiya emasmi? Qudratli. Biroq bozorlarini asta sekin boy berib borishi, Windows, Microsoft Office va Xboxdan boshqa hech qanday muvaffaqiyatli innovatsiyaga ega emasligi. Yaqin kelajakda Linux rivojlanishi tezligi davom etsa, Windowsdan bozorni tortib olishi ehtimoli yuqori ekanligi va shu kabi bir qancha omillarni inobatga olib Microsoft kelajakda o’z o’rnini yo’qotishi ehtimoli yuqoriroq degan xulosaga kelgan edik. Ha… Surface, Azure, GitHub, Windows Server kabi bir qancha turli sohalarga qaratilgan mahsulot va xizmatlari bor. Ammo Microsoft kompaniyasi asosiy daromadni qayerdan olishi va qaysi bozorlarda qudratli kuchga ega ekanligini yaxshi bilamiz. Linkedin esa vaziyatni keskin o’zgartirishga qodir (darvoqe GitHub ham). Aynan shuning uchun ham Microsoft yuqoridagi jiddiy o’rganiladigan kompaniyalar ro’yxatiga qo’shiladi.
Ha yana… Megakorporatsiya so’ziga ham alohida postda to’liq ta’rif beriladi. Hozircha dunyodagi ko’pgina davlatlardan qudratliroq korporatsiyalarni tushunib turaylik.